Braziliya və Yaponiya millisinin dünya çempionatının 1/16 final mərhələsindəki oyunu öncəsi sosial şəbəkələrdə qalmaqal yaşanıb.
MSNews.az xəbər verir ki, matçdan əvvəl iki ölkənin azarkeşləri arasında irqçi, ksenofob və təhqiramiz paylaşımların artdığı bildirilir. Sosial şəbəkələrdə yayılan məlumatlara görə, bəzi istifadəçilər bir-birini alçaltmaq üçün tarixi faciələrə, iqtisadi problemlərə və həssas sosial mövzulara istinad edən ifadələrdən istifadə ediblər.
Paylaşımlarda Yaponiyaya qarşı Xirosima və Naqasaki faciələri, Braziliyaya qarşı isə ölkənin sosial-iqtisadi problemləri ilə bağlı təhqiramiz ifadələrin işlədildiyi iddia olunur. Həmçinin bəzi paylaşımlarda intihar mövzusu kimi həssas məsələlərdən də istifadə edildiyi bildirilir.
FIFA, Braziliya Futbol Konfederasiyası və Yaponiya Futbol Assosiasiyasının bu konkret insidentlə bağlı ayrıca açıqlaması isə görünmür.
Braziliya – Yaponiya qarşılaşması 29 iyunda Hyuston stadionunda keçiriləcək.
