İranın vitse-prezidenti Seyid Həmid Purməhəmmədi Ermənistana səfərə gəlib.
MSNews.az xəbər verir ki, məlumata görə, İran rəsmisini Yerevanda yerləşən “Zvartnots” beynəlxalq hava limanında Ermənistanın Ərazi İdarəetmə və İnfrastruktur naziri David Xudatyan qarşılayıb.
“Armenpress”in daha əvvəl yaydığı məlumata əsasən, Seyid Həmid Purməhəmmədi İranın vitse-prezidenti, Planlaşdırma və Büdcə Təşkilatının rəhbəri, həmçinin Ermənistan-İran hökumətlərarası birgə komissiyasının həmsədri kimi fəaliyyət göstərir.
İran və Ermənistan arasında son dövrlərdə yüksək səviyyəli təmaslar intensivləşib. Ermənistan Baş nazirinin rəsmi saytının məlumatına görə, ötən il iki ölkə arasında siyasi məsləhətləşmələr, standartlaşdırma, turizm, peşə təhsili, şəhərsalma, səhiyyə və mədəniyyət sahələrini əhatə edən bir sıra sənədlər imzalanıb. Həmin sənədlərdən biri də Ermənistanın İqtisadiyyat Nazirliyi ilə İranın Milli Standartlar Təşkilatı arasında əməkdaşlığa dair memorandum olub və İran tərəfdən sənədi Seyid Həmid Purməhəmmədi imzalayıb.
“Armenpress”in məlumatına görə, Purməhəmmədi Ermənistan rəsmiləri ilə əvvəlki görüşlərində ikitərəfli münasibətlər, regional proseslər və kommunikasiya xətlərinin açılması məsələlərini müzakirə edib. Tərəflər bu mövzuda ərazi bütövlüyü, suverenlik, yurisdiksiya və qarşılıqlılıq prinsiplərinin vacibliyini vurğulayıblar.
Səfər Cənubi Qafqazda regional nəqliyyat marşrutları, enerji təhlükəsizliyi və iqtisadi əlaqələr ətrafında diplomatik fəallığın artdığı bir dövrdə baş tutur. İran və Ermənistan xüsusilə enerji, yol-nəqliyyat infrastrukturu və ticarət sahələrində əməkdaşlığı genişləndirməyə çalışır.
