Böyük Britaniyada Leyboristlər Partiyası daxilində liderlik mübarizəsi yenidən siyasi gündəmin əsas mövzularından birinə çevrilib.
MSNews.az xəbər verir ki, “Reuters” Endi Bernemin Kir Starmerin mümkün varisi kimi önə çıxdığını yazıb. Agentliyin məlumatına görə, Starmerin siyasi gələcəyini nəzərdən keçirməsi fonunda Bernem Leyboristlər daxilində ən ciddi alternativlərdən biri sayılır.
Bernemin mövqeyi Makerfilddə keçirilən əlavə seçkidə qazandığı inamlı qələbədən sonra daha da güclənib. “The Guardian” yazır ki, o, seçkidə 55% səs toplayaraq parlamentə qayıdıb və bu nəticə Starmerə mümkün liderlik çağırışı üçün siyasi zəmin yaradıb.
2017-ci ildən Böyük Mançesterin meri kimi tanınan Bernem regional səlahiyyətlərin artırılmasını siyasi xəttinin əsas hissələrindən biri kimi təqdim edir. “Reuters” onun “Manchesterism” adlandırılan yanaşmasının Londonun iqtisadi və siyasi mərkəzləşməsinə qarşı daha güclü yerli idarəçilik modelinə əsaslandığını bildirir.
Bernem çıxışlarında ölkədə iqtisadiyyat, miqrasiya, təhsil və sənaye sahələrində “fundamental dəyişiklik” çağırışı edib. Bununla belə, “Reuters” onun xarici siyasət, müdafiə və iqtisadi idarəetmə ilə bağlı mövqelərinin hələ tam aydın olmadığını qeyd edir.
