İngiltərə millisinin baş məşqçisi Tomas Tuxel DÇ-2026 üçün heyətdə gözlənilməz qərarlar verib. Britaniya mediasının məlumatına görə, “Mançester Yunayted”in müdafiəçisi Harri Maquayr, “Mançester Siti”nin yarımmüdafiəçisi Fil Foden və “Çelsi”nin futbolçusu Koul Palmer mundial heyətinə daxil edilməyib. Rəsmi heyətin mayın 22-də Uemblidə açıqlanacağı gözlənilir.
“Reuters” yazır ki, 66 oyunluq milli təcrübəyə malik Maquayr Tuxelin qərarından sonra məyusluğunu açıq şəkildə ifadə edib. Müdafiəçinin güclü klub mövsümü keçirməsinə baxmayaraq, Tuxelin daha çevik və fərqli profilli müdafiəçilərə üstünlük verdiyi bildirilir.
Fodenin heyətdən kənarda qalması da İngiltərə futbol ictimaiyyətində ciddi müzakirə yaradıb. Foden və Palmer son mövsümdə klub səviyyəsində əvvəlki performanslarını göstərə bilməyiblər və martdakı yoldaşlıq oyunlarında da Tuxeli tam razı salmayıblar.
“BBC Sport”-un jurnalisti Sami Mokbelə istinadən yayılan məlumatlarda Noni Maduekenin heyətə düşəcəyi, Foden, Palmer, Lyuk Şou və Fikayo Tomorinin isə siyahıdan kənarda qalacağı bildirilir. “Football365” bu xəbəri “BBC Sport”-a istinadla yayıb və Maduekenin Bukayo Saka və Deklan Raysla birlikdə İngiltərə heyətində yer almasının gözlənildiyini yazıb.
Digər gözlənilməz qərarlardan biri də hücumçu Ayvan Touninin milliyə qayıdışı ola bilər. TalkSPORT-un məlumatına görə, Tuxel Səudiyyə Ərəbistanında yüksək məhsuldarlıq göstərən Tounini heyətə daxil etməyə hazırlaşır.
