Sankt-Peterburqun “Zenit” klubu Rusiya Premyer Liqasının 2025/26 mövsümünün qalibi olub. Sergey Semakın komandası sonuncu — 30-cu turda səfərdə “Rostov”u 1:0 hesabı ilə məğlub edərək çempionluğu rəsmiləşdirib. Qarşılaşmada yeganə qolu 14-cü dəqiqədə penaltidən Aleksandr Sobolev vurub. “Rostov” 73-cü dəqiqədən etibarən Dmitri Çistyakovun qırmızı vərəqə alması səbəbindən azlıqda oynayıb.
Bu qələbədən sonra “Zenit” mövsümü 68 xalla birinci pillədə başa vurub. “Krasnodar” 66 xalla ikinci, Moskva “Lokomotiv”i isə 53 xalla üçüncü olub.
“Zenit” bununla Rusiya çempionatları tarixində 11-ci titulunu qazanıb. Sankt-Peterburq klubu bu göstəricidə 10 çempionluğu olan Moskva “Spartak”ını geridə qoyaraq Rusiyanın ən çox çempion olan klubu statusuna yüksəlib.
Sergey Semak üçün bu, “Zenit”in baş məşqçisi kimi 7-ci Rusiya çempionluğu olub. Peterburq təmsilçisi daha əvvəl 2007, 2010, 2012, 2015 və 2019–2024-cü illərdə də ölkə çempionu olmuşdu. Klubun aktivində həmçinin 1984-cü ildə qazanılmış SSRİ çempionluğu da var.
