Bakıda BMT-nin Ümumdünya Şəhərsalma Forumunun 13-cü sessiyasının — WUF13-ün təşkil olunduğu Bakı Olimpiya Stadionunda Birləşmiş Millətlər Təşkilatının rəsmi bayrağı və Azərbaycan Respublikasının Dövlət Bayrağının qaldırılması mərasimi keçirilib.
Mərasim WUF13-ün rəsmi başlanğıcını simvolizə edib və tədbirin yüksək beynəlxalq əhəmiyyətini bir daha nümayiş etdirib. Mərasimdə WUF13-ün milli koordinatoru, Dövlət Şəhərsalma və Arxitektura Komitəsinin sədri Anar Quliyev və BMT-nin Məskunlaşma Proqramının — UN-Habitat-ın icraçı direktoru Anaklaudia Rossbax iştirak ediblər.
Qeyd edək ki, WUF13 17–22 may tarixlərində Bakıda keçirilir. Forum “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna həsr olunub.
Tədbir BMT-nin Məskunlaşma Proqramı və Azərbaycan hökumətinin birgə təşkilatçılığı ilə keçirilir. WUF13 çərçivəsində şəhərsalma, dayanıqlı inkişaf, təhlükəsiz və inklüziv yaşayış məkanlarının formalaşdırılması kimi qlobal əhəmiyyətli məsələlərin müzakirəsi nəzərdə tutulur.
