Azərbaycan Respublikasının Prezidenti İlham Əliyev mayın 17-də Keniya Respublikasının Prezidenti Uillyam Samoei Rutonun başçılıq etdiyi nümayəndə heyəti ilə görüşüb. Bu barədə Azərbaycan Prezidentinin rəsmi saytında məlumat verilib.
Keniya Prezidenti Azərbaycana BMT-nin Ümumdünya Şəhərsalma Forumunun 13-cü sessiyasında — WUF13-də iştirak etmək məqsədilə səfərə gəlib. Heydər Əliyev Beynəlxalq Aeroportunda qonağı müdafiə sənayesi naziri Vüqar Mustafayev və digər rəsmi şəxslər qarşılayıblar.
Görüş WUF13 çərçivəsində Bakıda keçirilən yüksək səviyyəli beynəlxalq təmaslar fonunda baş tutub. Forumda şəhərsalma, dayanıqlı inkişaf, təhlükəsiz və inklüziv yaşayış mühitinin formalaşdırılması kimi qlobal məsələlər müzakirə olunur.
Azərbaycan ilə Keniya arasında siyasi dialoqun inkişafı, beynəlxalq platformalarda əməkdaşlıq və qarşılıqlı maraq doğuran sahələr üzrə əlaqələrin genişləndirilməsi iki ölkə münasibətlərinin əsas istiqamətləri sırasında yer alır. Prezident İlham Əliyev və Prezident Uillyam Samoei Ruto daha əvvəl 2025-ci ilin sentyabrında BMT-nin Nyu-Yorkdakı mənzil-qərargahında da görüşmüşdülər. Həmin görüşdə enerji, kənd təsərrüfatı, sənaye və beynəlxalq təşkilatlar çərçivəsində əməkdaşlıq məsələləri müzakirə edilmişdi.
