Bakıda keçirilən BMT-nin Ümumdünya Şəhərsalma Forumunun 13-cü sessiyasının — WUF13-ün ilk günündə Yeni Şəhər Gündəliyi üzrə nazirlər görüşü işə başlayıb. Görüş forum proqramına yeni təşəbbüs kimi daxil edilib və Azərbaycanın sədrliyi ilə keçirilir.
Nazirlər görüşü Yeni Şəhər Gündəliyinin 20 illik icra dövrünün orta mərhələsinə təsadüf edir. Bu baxımdan tədbir indiyədək əldə olunan nəticələrin qiymətləndirilməsi, mövcud çağırışların müzakirəsi və 2036-cı ilədək növbəti mərhələ üzrə prioritetlərin müəyyənləşdirilməsi üçün mühüm platforma hesab olunur.
WUF13-ün əsas mövzusu “Dünya üçün yaşayış: təhlükəsiz və dayanıqlı şəhərlər və icmalar” olaraq müəyyənləşdirilib. Bu çərçivədə nazirlər səviyyəsində aparılan müzakirələrdə mənzil təminatı, inklüzivlik, dayanıqlılıq və gələcəyin şəhər inkişafı məsələlərinə xüsusi diqqət yetirilir.
UN-Habitat-ın məlumatına görə, WUF13 müzakirələri yekunda Bakı Fəaliyyət Çağırışının formalaşmasına töhfə verəcək. Forum 17–22 may tarixlərində Bakıda keçirilir və hökumətləri, yerli hakimiyyətləri, vətəndaş cəmiyyətini, akademik dairələri, peşəkar assosiasiyaları və özəl sektoru bir araya gətirir.
Nazirlər görüşünün əsas məqsədlərindən biri şəhərsalma sahəsində daha praktik, nəticəyönümlü və koordinasiyalı yanaşmaların təşviqidir. Tədbirdə mənzilin yalnız sosial ehtiyac kimi deyil, həm də inklüziv, təhlükəsiz və dayanıqlı şəhər inkişafının əsas elementi kimi rolu müzakirə olunur.
