İngiltərə futbolunun tanınmış hücumçusu Ceymi Vardinin karyerasını bitirməzdən əvvəl daha bir mövsüm “Lester Siti”də çıxış etmək istədiyi iddia olunur. İtaliya mətbuatında yayılan məlumata görə, 39 yaşlı futbolçu “Kremoneze”dəki mövsümündən sonra “King Power” stadionuna qayıdaraq karyerasını doğma klubunda tamamlamaq variantını nəzərdən keçirir.
Məlumata əsasən, Vardi “Lester”də daha bir il futbolçu kimi oynamaq, hətta mümkün halda oyunçu-məşqçi rolu ilə komandaya kömək etmək istəyir. Lakin bu iddia hələlik rəsmi şəkildə təsdiqlənməyib. Jurnalist Ben Ceykobs isə bu xəbərlərlə bağlı “konkret əsas olmadığını” bildirib və Vardinin hazırda əsas diqqətini “Kremoneze”nin “A Seriyası”nda qalmasına yönəltdiyini qeyd edib.
Vardi 2025-ci ilin yayında “Lester”dən ayrılaraq İtaliyanın “Kremoneze” klubuna keçmişdi. Onun müqaviləsi 2026-cı ilin iyununa qədər nəzərdə tutulub və müəyyən şərtlər yerinə yetirilərsə, daha bir il uzadılma imkanı var.
Ceymi Vardi “Lester” tarixinin ən simvolik futbolçularından biri hesab olunur. O, klubla 2015/16 mövsümündə Premyer Liqa çempionluğu qazanıb, 2021-ci ildə İngiltərə Kubokunu əldə edib və “Lester” forması ilə 500 oyunda 200 qol vuraraq komandadan ayrılıb.
“Lester”in son illərdə ardıcıl uğursuzluqları və aşağı liqalara enməsi fonunda Vardinin mümkün qayıdışı azarkeşlər üçün emosional məna daşıyır. Bununla belə, hazırda bu ehtimal daha çox transfer iddiası kimi qiymətləndirilir və yekun qərar həm futbolçunun “Kremoneze”dəki vəziyyətindən, həm də “Lester”in yay planlarından asılı olacaq.
