Gürcüstan Pravoslav Kilsəsinin Müqəddəs Sinodu ölkənin 142-ci Katolikos-Patriarxını seçib. Səsvermənin nəticələrinə görə, mitropolit Şio Müciri Gürcüstanın yeni dini rəhbəri olub və bundan sonra Şio III adı ilə fəaliyyət göstərəcək.
Seçki Tbilisidəki Müqəddəs Üçlük — Sameba kafedralında keçirilən genişləndirilmiş kilsə məclisində baş tutub. Mitropolit Şio səsvermədə 22 səs toplayaraq birinci turda qalib gəlib. Digər namizədlərdən Urbnisi və Ruisi mitropoliti İov Akiaşvili 9, Poti və Xobi mitropoliti Qriqol Berbiçaşvili isə 7 səs alıb. Bir bülleten etibarsız sayılıb.
Yeni seçilən patriarxın tam titulu Bütün Gürcüstanın Katolikos-Patriarxı, Mtsxeta-Tbilisi arxiyepiskopu, Biçvinta və Sxum-Abxaziya mitropoliti olacaq. III Şionun intronizasiya mərasiminin 12 mayda Mtsxetadakı Svetitsxoveli kafedralında keçirilməsi planlaşdırılır.
Şio Müciri 57 yaşındadır. O, 2003-cü ildən Senaki və Çxorotsku yeparxiyasına rəhbərlik edib. 2017-ci ildə isə mərhum Katolikos-Patriarx II İliya tərəfindən patriarx taxtının “locum tenens”-i, yəni müvəqqəti idarəçisi təyin olunmuşdu. II İliya 2026-cı ilin martında 93 yaşında vəfat edib və Gürcüstan Pravoslav Kilsəsinə təxminən yarım əsr rəhbərlik etmişdi.
III Şionun seçilməsi Gürcüstan Pravoslav Kilsəsi üçün mühüm keçid mərhələsi hesab olunur. II İliyanın uzunmüddətli rəhbərliyindən sonra yeni patriarx kilsənin həm daxili idarəçiliyi, həm də Gürcüstanın ictimai-siyasi həyatındakı rolu baxımından diqqətlə izləniləcək.
