Şimali Koreya millisinin EA Sports FC 27 futbol simulyatorunda görünə biləcəyi bildirilir. Bu ehtimal AFC ilə EA SPORTS FC arasında imzalanmış yeni lisenziya razılaşması ilə əlaqələndirilir. Asiya Futbol Konfederasiyası mayın 6-da açıqlayıb ki, EA SPORTS FC 2027-ci ildə Səudiyyə Ərəbistanında keçiriləcək AFC Asian Cup turnirinin rəsmi lisenziyalı məhsulu olacaq. Razılaşma Asiyanın əsas milli komanda turnirinin EA SPORTS FC oyunlarına inteqrasiyasını nəzərdə tutur.
Şimali Koreya millisi 2027-ci il Asiya Kubokunun final mərhələsinə vəsiqə qazanan komandalar arasındadır. Mayın 9-da keçirilən püşkatmada Şimali Koreya “B” qrupunda Özbəkistan, Bəhreyn və İordaniya ilə eyni qrupa düşüb. Bu səbəbdən Asiya Kuboku lisenziyasının EA FC 27-yə inteqrasiyası Şimali Koreya yığmasının da oyunda yer alması ehtimalını artırır.
Bununla yanaşı, EA Sports və AFC hələlik EA FC 27-də yer alacaq bütün milli komandaların yekun siyahısını açıqlamayıb. AFC-nin rəsmi bəyanatında turnirin EA SPORTS FC məhsullarında təqdim ediləcəyi bildirilsə də, oyundaxili detalların, aktivləşdirmələrin və buraxılış vaxtının daha sonra elan olunacağı qeyd edilir.
Braziliya millisinin isə EA Sports FC seriyasına qayıdışı artıq rəsmi tərəfdaşlıqla təsdiqlənib. Braziliya Futbol Konfederasiyası — CBF və EA Sports FC gamescom latam 2026 zamanı çoxillik əməkdaşlıq elan edib. Bu razılaşma Braziliya millisinin uzun fasilədən sonra EA Sports FC oyunlarında rəsmi lisenziya ilə görünməsinə imkan verəcək.
Rusiya millisi və Rusiya klubları isə EA Sports oyunlarında 2022-ci ildən bəri yoxdur. EA Sports 2022-ci ilin martında Rusiyanın Ukraynaya müdaxiləsindən sonra Rusiya milli komandasını və Rusiya klublarını FIFA seriyasından çıxardığını açıqlamışdı.
