Azərbaycan Respublikasının Prezidenti İlham Əliyev mayın 10-da Zəngilan şəhərində inşa olunmuş 104 mənzilli ilk yaşayış kompleksinin açılışında iştirak edib. Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev kompleksdə yaradılan şərait barədə dövlət başçısına məlumat verib.
Qeyd olunub ki, bu yaşayış kompleksinin təməlqoyma mərasimi 2022-ci ildə Prezident İlham Əliyev və birinci xanım Mehriban Əliyevanın iştirakı ilə keçirilib. Dövlət başçısı 2024-cü və 2025-ci illərdə də kompleksdə aparılan tikinti işləri ilə tanış olub.
Ümumi ərazisi 2 hektardan artıq olan kompleksdə 12 bina inşa edilib. Onlardan 4-ü üçmərtəbəli, 8-i isə ikimərtəbəli “townhouse” tipli evlərdir. Kompleksdə ümumilikdə 104 mənzil var. Mənzillərdən 84-ü sakinlər, 20-si isə xidməti istifadə üçün nəzərdə tutulub. Yaşayış sahələri 2, 3, 4 və 5 otaqlıdır.
Yeni yaşayış kompleksində sakinlərin rahatlığı üçün uşaq və idman meydançaları, velosiped zolağı, yeraltı və yerüstü avtomobil dayanacaqları yaradılıb. Zəngilan şəhərinin Baş planına əsasən, kompleks şəhərin mərkəzi hissəsində, məktəb, körpələr evi-uşaq bağçası və parkın yaxınlığında, orta sıxlıqlı və çoxfunksiyalı zonada yerləşir.
Açılış Zəngilanda “Böyük Qayıdış” prosesinin növbəti mühüm mərhələsi kimi qiymətləndirilir. Yeni kompleks şəhərə qayıdan sakinlərin daimi yaşayış şəraiti ilə təmin olunması, sosial infrastrukturun formalaşdırılması və Zəngilanın mərhələli şəkildə bərpası baxımından xüsusi əhəmiyyət daşıyır.
