Kriştianu Ronaldunun nişanlısı, model və influenser Corcina Rodriges 2026-cı il “Met Gala” gecəsində seçdiyi obrazla moda gündəminin ən çox müzakirə olunan adlarından biri olub. O, Nyu-Yorkdakı Metropolitan İncəsənət Muzeyində keçirilən tədbirə “Ludovic de Saint Sernin” imzalı açıq akvamarin tonlarında libas və uzun duvaqla qatılıb.
“Vogue Arabia” yazır ki, obraz “Fashion Is Art” dress-koduna uyğun şəkildə həm cazibədar, həm də bədii interpretasiya kimi təqdim edilib.
Metropolitan Muzeyinin məlumatına görə, bu ilki “Met Gala” “Costume Art” sərgisinə həsr olunub. Sərgi geyim və insan bədəni arasındakı əlaqəni muzey kolleksiyasındakı sənət əsərləri ilə bir araya gətirir.
Corcinanın obrazında uzun tül duvaq, tikmə gül detalları, qatar hissəsi və korset silueti diqqət çəkib. “Vogue Arabia”-nın məlumatına görə, o, görünüşünü təsbeh detalı və yumşaq dalğalı saç düzümü ilə tamamlayıb.
Obraz sosial şəbəkələrdə “gəlinlik” assosiasiyası yaradıb və Ronaldonun nişanlısının mümkün toy hazırlıqları fonunda daha çox müzakirə olunub. “The Sun” yazır ki, Corcinanın paylaşımı izləyicilərdən çoxsaylı təriflər alıb, istifadəçilər onun Met Gala obrazını “ikonik” və “mükəmməl” adlandırıblar.
