İranın xarici işlər naziri Abbas Araqçi diplomatik nümayəndə heyətinin rəhbərliyi ilə Çinə səfər edib. Çin Xarici İşlər Nazirliyinin məlumatına görə, səfər mayın 6-da Pekinin dəvəti əsasında baş tutub və Çin xarici işlər naziri Van İ iranlı həmkarı ilə danışıqlar aparıb.
Çinin dövlət agentliyi “Sinxua” xəbər verir ki, Van İ və Abbas Araqçi arasında görüş Pekində başlayıb. Agentlik ilkin məlumatda danışıqların detalları barədə geniş açıqlama verməyib.
Bu, İranla bağlı son regional gərginlik fonunda Araqçinin Çinə ilk səfəridir. Görüş Vaşinqtonun Pekinə İranla əlaqələrindən istifadə edərək Hörmüz boğazı ətrafındakı vəziyyətin yumşaldılmasına təsir göstərməsi çağırışlarının artdığı bir dövrdə keçirilir.
Çin İranın mühüm siyasi və iqtisadi tərəfdaşlarından biri hesab olunur. Pekinin İran neftindən asılılığı və Yaxın Şərqdə enerji təhlükəsizliyi məsələləri bu danışıqları daha da əhəmiyyətli edir.
Hazırda tərəflərin görüşdən sonra birgə bəyanat yayıb-yaymayacağı məlum deyil. Çin Xarici İşlər Nazirliyinin əvvəlki açıqlamasında yalnız Araqçinin səfəri və Van İ ilə danışıqların keçiriləcəyi təsdiqlənmişdi.
