Bakıda Milli Onkologiya Mərkəzində baş vermiş partlayış nəticəsində ağır xəsarət alan həkim-radioloq Asif Nəsirlinin vəfat etməsi barədə yayılan məlumatlar rəsmi olaraq təkzib edilib. Baş Prokurorluqdan bildirilib ki, sosial şəbəkələrdə və bəzi media resurslarında yayılan ölüm xəbəri həqiqəti əks etdirmir.
Rəsmi açıqlamada qeyd olunub ki, partlayış nəticəsində xəsarət alan həkim Asif Nəsirlinin vəziyyəti ağırdır və onun müalicəsi davam etdirilir. “Həkimin ölməsi ilə bağlı yayılan məlumat yalandır”, — deyə Baş Prokurorluğun açıqlamasında vurğulanıb.
Qeyd edək ki, hadisə aprelin 30-da Milli Onkologiya Mərkəzinin Şüa-diaqnostika şöbəsinin birinci mərtəbəsində baş verib. İlkin məlumata görə, partlayış nəticəsində xəstə Mübariz Əliyev hadisə yerində vəfat edib, həkim-radioloq Asif Nəsirli isə ağır bədən xəsarətləri alaraq xəstəxanaya yerləşdirilib.
Asif Nəsirli 1999–2005-ci illərdə Azərbaycan Tibb Universitetinin Müalicə-profilaktika fakültəsində təhsil alıb. O, 2005–2006-cı illərdə Milli Onkologiya Mərkəzində internatura, 2006–2008-ci illərdə isə kliniki ordinatura keçib. 2008-ci ildən Milli Onkologiya Mərkəzinin Şüa terapiyası şöbəsində və Uşaq klinikasında radiasiya onkoloqu kimi çalışıb.
Hadisə ilə bağlı araşdırma davam etdirilir.
