Yeni araşdırmaya görə, dünyada 7 əsas qida qrupu üzrə özünü tam şəkildə ərzaqla təmin edə bilən yeganə ölkə Qayanadır.
“Nature Food” jurnalında dərc olunan tədqiqat göstərir ki, 186 ölkə arasında yalnız Qayana meyvə, tərəvəz, süd məhsulları, balıq, ət, paxlalılar-qoz-fındıq və nişastalı əsas qidalar üzrə daxili istehsalla əhalinin ehtiyacını ödəyə bilir. Çin və Vyetnam isə altı qida qrupunda bu səviyyəyə çatır.
Araşdırmada vurğulanır ki, ölkələrin böyük əksəriyyəti bütün qida qrupları üzrə özünütəminetmə qabiliyyətinə malik deyil. Məlumata görə, 154 ölkə yalnız 2-5 qida qrupu üzrə tələbatı daxili istehsal hesabına qarşılaya bilir, altı ölkə isə heç bir qrup üzrə tam yetərli səviyyəyə çatmır.
Tədqiqatın müəllifləri bunu qlobal ərzaq təhlükəsizliyi baxımından vacib siqnal sayırlar. Onların fikrincə, bir çox ölkənin idxaldan yüksək asılılığı müharibə, iqlim dəyişiklikləri və tədarük zənciri pozuntuları fonunda əlavə risk yaradır. Bununla belə, araşdırma “özünütəminetmə”ni ölkələrin bütün qidanı faktiki olaraq idxalsız istehlak etməsi kimi yox, yeddi qida qrupu üzrə tövsiyə edilən sağlam pəhriz ehtiyacını daxili istehsalla qarşılamaq qabiliyyəti kimi ölçür.
