Beynəlxalq Atom Enerjisi Agentliyinin baş direktoru Rafael Qrossi bildirib ki, İranın yüksək səviyyədə zənginləşdirilmiş uran ehtiyatı hələ də ciddi narahatlıq doğurur. Onun sözlərinə görə, ehtiyatın böyük hissəsi İsfahanda yerləşir, müəyyən miqdarı isə Natanzdadır və bu materialın bir hissəsi başqa yerə köçürülsə belə, yenə də “bir neçə döyüş başlığı” üçün kifayət edə biləcək həcmdə uran qala bilər. Qrossi bu fikirləri “CBS News”-a müsahibəsində səsləndirib.
Qrossi “CBS”-yə deyib ki, ehtiyatın “böyük əksəriyyəti” İsfahandadır və Natanzda da müəyyən həcm mövcuddur. O, bu payın 70 faizdən bir qədər az ola biləcəyini vurğulayıb. “Reuters” isə martın 9-da yazıb ki, Qrossinin qiymətləndirməsinə görə, İranın 60 faizədək zənginləşdirilmiş uranının təxminən yarısı və ya 200 kiloqramdan bir qədər çoxu İsfahandakı tunel kompleksində saxlanılır, müəyyən hissə isə Natanzda qalır.
“Reuters”-in materialına görə, MAQATE-nin son hesablamasında İranın əlində 440,9 kiloqram 60 faiz zənginləşdirilmiş uran var idi. Bu səviyyə hələ silah səviyyəsi sayılmır, amma ona çox yaxındır; daha da zənginləşdirilərsə, nəzəri olaraq təxminən 10 nüvə silahı üçün partlayıcı material əldə edilə bilər. Bununla yanaşı, MAQATE hələ də İranın koordinasiyalı aktiv nüvə silahı proqramı apardığına dair inandırıcı sübut görmədiyini bildirir.
Qrossinin əsas mesajı budur ki, hərbi zərbələr İranın nüvə proqramını geriyə salsa da, problemi tam həll etməyib. “CBS”-yə danışan MAQATE rəhbəri vurğulayıb ki, müharibə başa çatsa belə, yüksək zənginləşdirilmiş uran ehtiyatı və sağ qalan infrastruktur səbəbindən “əsas problemlər” qalacaq.
