Pakistanın xarici işlər naziri Məhəmməd İshaq Dar bildirib ki, İran daha 20 Pakistan bayraqlı gəminin Hörmüz boğazından keçidinə razılıq verib. Onun sözlərinə görə, gəmilər gündə iki vahid olmaqla boğazdan keçəcək. Dar bu qərarı “konstruktiv jest” və “sülhün xəbərçisi” adlandırıb.
Məlumatı MSNews.az “Yeni Şafak” nəşrinə istinadən verir.
Bu açıqlama İranın boğazla bağlı son mövqeyi fonunda diqqət çəkir. Daha əvvəl Tehran BMT və Beynəlxalq Dəniz Təşkilatına göndərdiyi bildirişdə “düşmənlə əlaqəli olmayan” gəmilərin Hörmüz boğazından keçə biləcəyini, lakin bunun İran tərəfi ilə koordinasiya şəraitində mümkün olacağını bəyan etmişdi.
Bununla belə, bölgədə keçid hələ də tam sabitləşməyib. İranın verdiyi təminatlara baxmayaraq bəzi gəmilər risk səbəbindən boğazdan çıxış cəhdini dayandırıb və geri dönüb. Bu isə göstərir ki, seçilmiş ölkələrin gəmilərinə verilən icazələr ümumi dəniz təhlükəsizliyi problemini tam aradan qaldırmır.
Pakistan tərəfi isə qərarı regionda gərginliyin yumşalmasına yönəlmiş müsbət siqnal kimi təqdim edir. Dar vurğulayıb ki, dialoq, diplomatiya və etimad yaradan addımlar irəliyə aparan yeganə yoldur. Bu fonda İslamabadın Hörmüz marşrutu ilə bağlı həm diplomatik, həm də logistik kanalları aktiv saxladığı görünür.
