İsrailin “Kanal 14” televiziya kanalının yaydığı məlumata görə, Məsud Pezeşkian ölkə daxilində artan gərginlik fonunda istefa ehtimalını nəzərdən keçirir.
Kanalın baş analitiki Dror Balazadanın mənbələrə istinadən verdiyi məlumata əsasən, İran prezidenti ilə SEPAH arasında ciddi fikir ayrılıqları mövcuddur. Bu gərginliyin son dövrlərdə yüksək vəzifəli şəxslərin ardıcıl şəkildə aradan götürülməsi ilə daha da dərinləşdiyi iddia olunur.
Məlumata görə, Pezeşkianın əsas narazılığı Ali Laricaninin ölümü ilə bağlıdır. İddialara əsasən, prezident bu hadisəni sadəcə təhlükəsizlik zəifliyi kimi deyil, qəsdən həyata keçirilmiş əməl kimi qiymətləndirir.
Eyni zamanda, kanalın mənbələri SEPAH daxilində Laricaninin ölümünün müsbət qarşılandığını iddia edir. Bildirilir ki, qurum tərəfindən əvvəlcədən onun və qardaşının “ləğv edilməsi” ilə bağlı dosyenin hazırlandığı da ehtimal olunur.
Qeyd olunur ki, bu məlumatlar hələlik rəsmi mənbələr tərəfindən təsdiqlənməyib və iddia xarakteri daşıyır.
