İranın Milli Təhlükəsizlik Ali Şurasının katibi Əli Laricaninin qızı Fatimə Ərdeşir Laricani 2021-ci ildə Co Bayden administrasiyası dövründə “qrin-kart” əldə edib. “Daily Mail” yazır ki, 2023-cü ildə ona Corciya ştatında 31 avqust 2026-cı ilədək qüvvədə olan tam həkimlik lisenziyası verilib.
Fatimə 2017-ci ildə ABŞ-a köçərək Klivlend Universiteti klinikalarında təhsil alıb və sonra İndiana Universitetində klinik tədqiqatlar üzrə magistr dərəcəsi qazanıb. Yanvarın sonunda Emori Universiteti Fatimənin işinə xitam verdiyini açıqlayıb. Universitet əlavə təfərrüatları açıqlamayıb, lakin onun ABŞ-ı tərk etdiyi ehtimal olunur.
Laricani ailəsinin Qərblə əlaqələri bununla bitmir. Onun qardaşı Baqer Ərdeşir Laricani 2017-ci ildə Kanadada daimi yaşayış statusu alıb, lakin 2022-ci ildə Kanadada tələb olunan 730 günü keçirmədiyi üçün ölkəni tərk etməsi tələb olunub.
