Suriyada fəaliyyət göstərən kürd terror təşkilatı olan PYD-nin keçmiş həmsədri Saleh Müslim vəfat edib. O, 11 mart 2026-cı ildə İraqın Ərbil şəhərində yerləşən xəstəxanalardan birində həyatını itirib.
Məlumata görə, 75 yaşlı siyasətçi bir müddət idi ki, ciddi sağlamlıq problemləri yaşayırdı və böyrək çatışmazlığı səbəbindən müalicə alırdı. Onun səhhəti ağırlaşdıqdan sonra Ərbildə yerləşən xəstəxanada dünyasını dəyişdiyi bildirilib.
1951-ci ildə Suriyanın Kobani bölgəsində anadan olan Saleh Müslim uzun illər kürd siyasi hərəkatında aktiv fəaliyyət göstərib. O, 2003-cü ildə yaradılmış Demokratik Birlik Partiyasının (PYD) əsas simalarından biri olub və 2010-cu ildən partiyanın həmsədri kimi fəaliyyət göstərib.
Suriyada vətəndaş müharibəsinin başlamasından sonra Müslim beynəlxalq arenada PYD və şimal-şərqi Suriyada qurulan kürd muxtariyyət modelinin əsas siyasi təmsilçilərindən biri kimi çıxış edib.
Onun ölümü ilə bağlı müxtəlif siyasi və hərbi kürd strukturlarının nümayəndələri başsağlığı mesajları yayıb və Müslimin uzun illər kürd siyasi hərəkatında mühüm rol oynadığını qeyd ediblər.
