Böyük Britaniya hökuməti regional təhlükəsizlik risklərini əsas gətirərək Böyük Britaniyanın Xarici İşlər Nazirliyinin qərarı ilə Böyük Britaniyanın Tehrandakı səfirliyinin fəaliyyətini müvəqqəti dayandırıb. Diplomatik nümayəndəliyin bütün əməkdaşları təhlükəsizlik məqsədilə müvəqqəti olaraq ölkədən çıxarılıb və konsulluq xidmətlərinin uzaqdan göstərildiyi bildirilib.
Nazirliyin yenilənmiş səyahət xəbərdarlığında Böyük Britaniya vətəndaşlarına İranın bütün ərazisinə səfər etməmək tövsiyə olunub. Açıqlamada bölgədə risklərin artdığı, təhlükəsizlik vəziyyətinin qeyri-sabit olduğu və gərginliyin daha da yüksələcəyi təqdirdə əlavə məhdudiyyətlərin tətbiq oluna biləcəyi vurğulanıb.
İranda olan Britaniya vətəndaşlarına rəsmi səyahət bildirişlərinə abunə olmaq, yerli medianı izləmək, hərbi obyektlərdən uzaq durmaq, ölkəni tərk etmə planlarını nəzərdən keçirmək və zərurət yarandıqda sığınacaq tədbirlərini qiymətləndirmək tövsiyə edilib.
Qeyd edək ki, Böyük Britaniyanın Tehrandakı səfirliyi yanvar ayında da İranda baş verən etirazlar fonunda müvəqqəti olaraq bağlanmış, diplomatik heyət ölkədən çıxarılmışdı.
