Kuba Prezidenti Migel Diaz-Kanel, ABŞ çıxışlı sürət qayığının ölkənin ərazi sularında təhlükəsizlik qüvvələrinə silahlı müqavimət göstərməsi ilə bağlı insidentdən sonra Kubanın suverenliyinin qətiyyətlə qorunacağını bəyan edib.
Prezident “X” sosial media platformasında paylaşdığı açıqlamada, Kuba təhlükəsizlik qüvvələrinin həyata keçirdiyi əməliyyatın ölkənin milli təhlükəsizliyinin təmin olunmasına yönəldiyini bildirib. Diaz-Kanel vurğulayıb ki, “Kuba hücum etmir və heç kimi təhdid etmir, lakin milli suverenliyini və sabitliyini hədəf alan hər cür terrorçu və muzdlu hücumlara qarşı sarsılmaz mövqe ilə özünü müdafiə edəcək”.
Kuba xarici işlər naziri Bruno Rodrigez də məsələ ilə bağlı açıqlamasında qeyd edib ki, 1959-cu ildən bəri Kuba dəfələrlə ABŞ mənbəli terrorçu sızmalar və silahlı hücumlarla üzləşib və bu proses ciddi insan tələfatı və maddi zərərlə nəticələnib.
Xatırladaq ki, Kuba təhlükəsizlik qüvvələri ölkənin ərazi sularında “dayan” əmrinə tabe olmayan və polis katerinə atəş açan ABŞ çıxışlı sürət qayığında olan 4 nəfəri zərərsizləşdirib. Rəsmi məlumata görə, qayıqda olan 10 nəfərin əksəriyyətinin ağır cinayət və zorakılıq keçmişi olub və onların ABŞ-da yaşayan silahlı kubalılar olduğu, adaya sızaraq terror aktları törətməyi planlaşdırdıqları iddia edilir.
ABŞ Dövlət Katibi Marko Rubio isə hadisədən dərhal sonra araşdırmaya başlandığını, ABŞ Daxili Təhlükəsizlik Nazirliyi və Sahil Mühafizəsinin prosesə cəlb edildiyini açıqlayıb.
