Hollandanın kral hava yolu şirkəti KLM martın 1-dən etibarən İsrailə bütün uçuşlarını dayandıracağını açıqlayıb. İsrail mətbuatının, xüsusilə “Yediot Ahronot” qəzetinin məlumatına görə, qərar ABŞ ilə İran arasında artan gərginlik fonunda qəbul edilib.
Şirkət Amsterdam–Tel-Əviv marşrutu üzrə reyslərin ləğv ediləcəyini bildirərək, hazırkı mərhələdə İsrail istiqamətinə uçuşların kommersiya və əməliyyat baxımından məqsədəuyğun olmadığını vurğulayıb. KLM eyni zamanda regional təhlükəsizlik vəziyyətini yaxından izlədiyini və şərait dəyişərsə qərara yenidən baxıla biləcəyini qeyd edib. Qərar İsrailə hava əlaqələri ilə bağlı beynəlxalq daşıyıcıların risk qiymətləndirmələrinin sərtləşdiyini göstərən son addımlardan biri kimi dəyərləndirilir.
