Fevralın 25-i Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva Xocalı rayonunun Xanabad kəndində həyata keçirilmiş quruculuq və bərpa işləri ilə tanış olublar.
Prezidentin xüsusi nümayəndəsi kənddə görülən işlər, təmir-bərpa prosesi və əhalinin vəziyyəti barədə məlumat verib. Xanabad işğaldan azad edildikdən sonra burada 276 evdən 120-si tam təmir olunub, əlavə 41 ev bu ilin sonuna qədər istifadəyə veriləcək. Fevral ayı ərzində 38 ailə — 154 nəfər kəndə qayıdıb.
Regionda enerji infrastukturunun bərpası, yeni elektrik, qaz və optik xətlərin çəkilməsi, su təminatı sistemlərinin yaradılması, yolların yenidən qurulması kimi sosial obyektlərin inşası işləri görülüb. Eyni zamanda kənddə park, estakada və Dövlət Bayrağı meydanı salınıb.
Prezident İlham Əliyev və birinci xanım sakinlərlə görüşərək onların həyat şəraiti və məşğulluq məsələləri ilə bağlı söhbət ediblər; kəndə köç etmiş ailələrin sosial-iqtisadi durumu və gələcək planlar müzakirə olunub.
