Türkiyəli jurnalist və yazar Yılmaz Özdil televiziya proqramında səsləndirdiyi fikirlərlə gündəmə gəlib. O, mümkün yeni siyasi partiya ssenarisi və seçki ehtimalları ilə bağlı diqqətçəkən iddialar irəli sürüb.
Özdil bildirib ki, PKK lideri Abdullah Öcalan ətrafında gedən müzakirələr gələcək siyasi proseslərə təsir göstərə bilər. Onun sözlərinə görə, müəyyən dairələrdə yeni siyasi partiyanın yaradılması ssenarisi müzakirə olunur və bu strukturun seçkilərdə həlledici rol oynaya biləcəyi ehtimal edilir.
Jurnalist iddia edib ki, formalaşa biləcək yeni siyasi platforma prezident seçkilərinin ilk turunda hakim blokun namizədi, Türkiyə Prezidenti Rəcəb Tayyip Ərdoğan üçün üstünlük yarada bilər. Özdilin fikrincə, bu proses seçki dinamikasını dəyişdirə və siyasi balanslara təsir göstərə bilər.
O, həmçinin növbəti seçkilərin vaxtı ilə bağlı müxtəlif ehtimallara toxunaraq, rəsmi təqvim 2027-ci ili göstərsə də, siyasi və iqtisadi şərtlərdən asılı olaraq erkən seçki variantının da istisna olunmadığını qeyd edib.
Qeyd edək ki, səsləndirilən fikirlər şəxsi siyasi analiz və proqnoz xarakteri daşıyır. Rəsmi qurumlar tərəfindən bu istiqamətdə hər hansı qərar və ya təşəbbüs açıqlanmayıb.
