ABŞ-da fəaliyyət göstərən xəbər platforması “Axios” iddia edib ki, Vaşinqton İranın nüvə proqramı ilə bağlı danışıqlarda “simvolik səviyyədə” uranın zənginləşdirilməsinə icazə verilməsi variantını nəzərdən keçirə bilər. Nəşrə danışan yüksək vəzifəli ABŞ rəsmisi bildirib ki, bu model İranın nüvə silahı əldə etmə ehtimalını aradan qaldıracaq çərçivədə hazırlanır.
Mənbənin sözlərinə görə, ABŞ Prezidenti Donald Tramp siyasi baxımdan qəbul edilə bilən və konkret nəticə verəcək razılaşmaya açıqdır. Rəsmi əlavə edib ki, əgər Tehran mümkün hərbi zərbənin qarşısını almaq istəyirsə, Vaşinqton üçün “rəddedilməz təklif” irəli sürməlidir.
Digər mənbələr isə Trampa İranla bağlı bütün ssenarilərin təqdim olunduğunu, hətta variantlardan birinin İranın ali dini lideri Əli Xamenei və onun oğlunun hədəfə alınması ehtimalı olduğunu iddia edib.
İran tərəfi isə uranın zənginləşdirilməsinin tam dayandırılması tələbinin gündəmdə olmadığını bildirir. İranın xarici işlər naziri Abbas Araqçi yaxın günlərdə Vaşinqtona nüvə sazişi ilə bağlı təklif layihəsi təqdim ediləcəyini açıqlayıb.
Müşahidəçilər hesab edirlər ki, tərəflər arasında diplomatik kanallar açıq qalsa da, sərt bəyanatlar regionda gərginliyin artması riskini saxlayır.
