ABŞ Prezidenti Donald Tramp NBC telekanalının “Today” proqramının aparıcısı Savannah Qatrinin anası Nensi Qatrinin qaçırılması ilə bağlı sərt açıqlama verib. O bildirib ki, 84 yaşlı Qatri ölü tapılacağı təqdirdə, hadisəyə görə məsuliyyət daşıyan şəxslər üçün ən ağır federal cəza – edam hökmü tələb olunacaq.
Tramp “New York Post” nəşrinə telefon müsahibəsində deyib ki, belə bir ssenari baş verərsə, şübhəlilər ağır federal ittihamlarla üzləşəcək. Ədliyyə Nazirliyinin iş üzrə edam cəzası tələb edib-etməyəcəyi barədə suala cavabında isə prezident “Ən ağır olanı, bəli” ifadəsini işlədib.
Federal Təhqiqatlar Bürosu (FTB) Nensi Qatrinin tapılması və ya hadisə ilə bağlı şəxslərin müəyyənləşdirilməsinə kömək edəcək məlumat üçün elan olunan mükafatın məbləğini 100 min dollara çatdırıb.
FTB direktoru Kaş Patel bildirib ki, Qatrinin sonuncu dəfə yanvarın 31-də əlaqə saxladığı müəyyən edilib və evdəki müşahidə kameralarının görüntüləri bərpa olunub. Təhlükəsizlik kameraları tərəfindən qeydə alınan kadrlarda onun itkin düşdüyü səhər evin ön qapısındakı kameranı qurdalayan silahlı şəxsin görüntüləri əks olunub.
FTB və Pima dairəsi Şerif Departamentinin birgə araşdırması nəticəsində Qatrinin evindən təxminən 3 kilometr məsafədə tapılan əlcək üzərindəki DNT nümunələrinin, itkin düşdüyü gecə evinin qarşısında görünən maskalı şübhəlinin əlcəyi ilə uyğun gəldiyi açıqlanıb.
Hüquq-mühafizə orqanları hadisə ilə bağlı məlumatı olan şəxsləri FTB-nin qaynar xətti və onlayn müraciət platforması vasitəsilə əlaqə saxlamağa çağırıb. İstintaq davam edir.
