Fevralın 2-də Azərbaycan Respublikasının Prezidenti İlham Əliyev Əbu-Dabidə Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyan ilə görüşüb.
Görüş zamanı Azərbaycan-BƏƏ ikitərəfli əlaqələrinin strateji tərəfdaşlıq səviyyəsində inkişaf etdiyi vurğulanıb. Ölkələr arasında əməkdaşlığın siyasi, iqtisadi, enerji, bərpaolunan enerji, mədəni və humanitar sahələrdə genişləndirilməsi məsələsi müzakirə olunub. Hər iki prezidentin qarşılıqlı səfərlərinin və görüşlərinin əlaqələrin inkişafında mühüm rol oynadığı qeyd edilib.
Görüşdə Əbu-Dabidə Azərbaycanın və BƏƏ-nin Silahlı qüvvələri arasında keçirilən “Sülh Qalxanı – 2026” birgə əməliyyat-taktiki təliminin əhəmiyyəti vurğulanıb. Təlimlərin hər iki ölkənin Silahlı qüvvələri arasında operativ uyğunluğun inkişafına töhfə verəcəyi və gələcəkdə davam etdirilməsinin önəmi qeyd olunub.
Dövlət başçıları əlaqələrin perspektivləri və gələcək təmaslar barədə fikir mübadiləsi aparıblar. Daha sonra Azərbaycan və BƏƏ prezidentlərinin iştirakı ilə “Cənub Qaz Dəhlizi” QSC-də İqtisadiyyat Nazirliyinə məxsus qeyri-nəzarət payının müəyyən hissəsinin Əbu-Dabi Milli Neft Şirkətinin investisiya qolu olan XRG şirkətinə satışı ilə bağlı alqı-satqı müqaviləsi imzalanıb.
Səfər çərçivəsində Azərbaycan və BƏƏ Müdafiə Nazirlikləri arasında müdafiə əməkdaşlığı razılaşması barədə niyyət məktubu da imzalanıb. Hər iki tərəf bu sənədlərin ölkələrarası əlaqələrin daha da inkişafına təkan verəcəyinə əminliklərini ifadə edib.
Görüş zamanı Bakı ilə Əbu-Dabi arasında qardaşlaşma münasibətlərinin yaradılması məsələləri də müzakirə olunub.
