Suriya hökuməti ilə YPG arasında imzalanan razılaşma çərçivəsində, Suriya təhlükəsizlik qüvvələri ölkənin şimal-şərqində yerləşən Kamışlı rayonunun mərkəzinə daxil olub.
Suriya Daxili İşlər Nazirliyinə bağlı təhlükəsizlik qüvvələrindən ibarət konvoy, YPG-nin nəzarətində olan Haseke vilayətinin Kamışlı rayonuna daxil olub. Təxminən 20 hərbi avtomobil və 100 təhlükəsizlik əməkdaşından ibarət konvoy yerli əhali tərəfindən sevinclə qarşılanıb.
Daha əvvəl hökumət qüvvələri Haseke şəhərinin mərkəzinə və Hələb vilayətinin Aynularab qəsəbəsinə bağlı Şuyuk kəndinə daxil olmuşdu.
Daxili İşlər Nazirliyinin sözçüsü Nureddin Baba bildirib ki, hökumət qüvvələri YPG-dən təhvil alınan bölgələrdən artıq ayrılmayacaq. Baba Kamışlı girişində jurnalistlərə açıqlamasında razılaşmaya əsasən təhlükəsizlik qüvvələrinin Haseke mərkəzində yerləşdiyini və Kamışlıda da fəaliyyətə başladığını qeyd edib.
YPG-nin əvvəllər işğal etdiyi hərbi hava bazası və kritik neft quyularının təhvil verilməsinə dair suala cavab verən Baba bildirib: “Razılaşmada nəzərdə tutulduğu kimi Kamışlı hava bazası, neft quyuları və hökumət binaları Suriya hökuməti tərəfindən vətəndaşlara xidmət üçün təhvil veriləcək.”
Sözcü həmçinin YPG sıralarında olan xarici şəxslərin mövqeləri ilə bağlı məsələnin siyasi danışıqlar nəticəsində həll ediləcəyini bildirib.
Baba əlavə edib ki, hökumət qüvvələrinin bölgəyə daxil olması bir razılaşma çərçivəsindədir və buradan çıxmayacaq: “İnteqrasiya çərçivəsində YPG-nin ‘asayiş’ adlanan sözdə polis qüvvələri Daxili İşlər Nazirliyinə birləşdiriləcək.”
O, həmçinin qeyd edib: “Suriya xalqı üçün işləyəcək hər bir vətəndaşı məmnuniyyətlə qarşılayırıq. Fərqli etnik kimliklərin bir arada olması bizi zəiflətməyəcək, əksinə gücləndirəcək.”
Baba hökumətin təhvil aldığı bölgələrdəki sevincli qarşılanmaya toxunaraq deyib: “Suriya hökumətinin daxil olduğu hər bölgədə xalq bizləri sevinclə qarşıladı. Bunun üçün təşəkkür edirik. Həmçinin, xalqdan atəş açmaqla qeyd etməmələrini xahiş edirik. Hazırda həssas bir dövrdən keçirik. Əsas məqsədimiz etimadın bərpasıdır. Qarşıdakı günlərdə daha nizamlı tədbirlərlə bayramları qeyd edəcəyik.”
